ខេត្តព្រះវិហារ ៖ ឯកឧត្តម គីម រិទ្ធី អភិបាលនៃគណ:អភិបាលខេត្តព្រះវិហារ អមដំណើរដោយ អភិបាលរងខេត្ត មន្ទីរជំនាញ និងអាជ្ញាធរមូលដ្ឋានស្រុកគូលែន នារសៀល ថ្ងៃទី១០ ខែតុលា ឆ្នាំ២០២២នេះ បានអញ្ជើញចុះត្រួតពិនិត្យពីស្ថានភាពទឹកជំនន់ ដំណាំស្រូវរដូវវស្សា ជីវភាពរស់នៅរបស់ប្រជាពលរដ្ឋ និងហេដ្ឋារចនាសម្ព័ន្ធមួយចំនួនដែលកំពុង រងផលប៉ះពាល់ដោយសារទឹកជំនន់ នៅឃុំថ្មី និងឃុំគូលែនជើង ស្រុកគូលែន ខេត្តព្រះវិហារ។
យោងតាមរបាយការណ៍របស់មន្ទីរកសិកម្មរុក្ខាប្រមាញ់និងនេសាទខេត្តព្រះវិហារ ក៏ដូចជារបាយការណ៍របស់គណៈកម្មការគ្រប់គ្រងគ្រោះមហន្តរាយខេត្តព្រះវិហារ បានបញ្ជាក់ថាចំនួនទឹកនៅទូទាំងខេត្តព្រះវិហារ គិតត្រឹមថ្ងៃទី០៩ ខែតុលា ឆ្នាំ២០២២ ផលប៉ះពាល់ដែលរងដោយជំនន់ទឹកភ្លៀងបានបានធ្វើឲ្យលំនៅឋានរបស់ប្រជាពលរដ្ឋចំនួន២២៩ខ្នងផ្ទះ និងជម្លៀសប្រជាពលរដ្ឋមកទីទួលសុវត្ថិភាពចំនួន ១២៣ គ្រួសារ។ក្នុងនោះដែរផលប៉ះពាល់ស្រូវស្រែចំការចំនួន ៣.៤២១ ហិចតា ស្មើនឹង ១.៦៨៧ គ្រួសារនិងដំណាំផ្សេងៗចំនួន ៦៣៩ ហិចតាស្មើនឹង៣០៥ គ្រួសារ ក្នុងនោះមានការខូចខាតជាបឋមដោយសារទឹកមិនស្រកផុតគឺស្រូវស្រែចម្ការ ៥១៤ហិចតា ស្មើនឹង ១៤១ គ្រួសារនិងដំណាំផ្សេងៗ១៨២ហិកតា ស្មើនឹង ៣០គ្រួសារ។
ដោយឡែកហេដ្ឋារចនាសម្ព័ន្ធនៅក្រុងស្រុកចំនួន ៦ ក្នុងនោះផ្លូវគ្រប់គ្រងដោយមន្ទីរសាធារណការនិងដឹកជញ្ជូនខេត្តនិងប៉ះពាល់ប្រវែងផ្លូវ២១.៥៩០ម៉ែត្រ និងផ្លូវគ្រប់គ្រងដោយមន្ទីរអភិវឌ្ឍន៍ជនបទមានចំនួន ៩ ខ្សែ លើ ៥ ក្នុងស្រុក ត្រូវបានលិចលង់សរុបចំនួន១៣.០៦០ ម៉ែត្រ ក្នុងនោះទឹកហូរច្រោះដាច់តួផ្លូវប្រវែង២៦០០ម៉ែត្រនិងហូរច្រោះជើងទេប្រវែងសរុប៧២៣០ម៉ែត្រព្រមទាំងសំណង់សិល្បៈការជាច្រើនកន្លែង។
