បដិវត្តន៍ឧស្សាហកម្ម៤.០ នឹងបង្កើតជំនាញថ្មីៗជាច្រើន ហើយជំនាញមួយចំនួននឹងបាត់បង់

នៅក្នុងសិក្ខាសាលាអប់រំស្តីពី “អភិបាលកិច្ច និងភាពជាអ្នកដឹកនាំអប់រំក្នុងយុគសម័យទំនើប” រៀបចំដោយសហព័ន្ធសេវាអប់រំនៅកម្ពុជា កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា នៅក្នុងបរិបទ​យុគសម័យ​បដិវត្តឧស្សាហកម្ម៤.០ ជំនាញថ្មីៗជាច្រើននឹងកើតឡើងក្នុងរយៈពេលដ៏ខ្លី ហើយជំនាញមួយចំនួនក៏បាត់បង់ផងដែរ។

ដើម្បីឆ្លើយតបទៅនឹងបដិវត្តន៍ឧស្សាហកម្មទី៤ ក្រសួងអប់រំ យុវជន និងកីឡា បានដាក់ចេញជា​ចក្ខុវិស័យ និងគោលដៅក្នុងការធ្វើកំណែទម្រង់វិស័យអប់រំ ដោយសមាសភាពសំខាន់ក្នុង​កំណែ​ទម្រង់ រួមមាន៖ ទី១ គុណភាពគ្រូបង្រៀន ដែលជាអ្នកសម្របសម្រួលក្នុងការសិក្សា​របស់​សិស្ស, ទី២ គឺកម្មវិធីសិក្សាតាមបែបបញ្ញត្តិ ដែលរៀនមិនត្រឹមការទន្ទេញឱ្យចាំនោះទេ តែរៀនដើម្បីឱ្យសិស្សចេះត្រិះរិះពិចារណា រកហេតុផល និងចេះប្រៀបធៀបរវាងអតីតកាល បច្ចុប្បន្នកាលនិងអនាគតកាល តាមរយៈវិធីសាស្ត្របង្រៀនថ្មី ដោយបង្រៀនឱ្យសិស្សចេះធ្វើ​ការងារ​ជាក្រុម មិនថាមេរៀនបែបប្រវត្តិសាស្ត្រ ឬវិទ្យាសាស្ត្រ ទី៣ គឺការវាយតម្លៃទាំងការ​បង្រៀន​ក្នុងថ្នាក់រៀន និងការប្រឡងមធ្យមសិក្សាទុតិយភូមិ(បាក់ឌុប) ទី៤ គឺការអនុវត្ត​អធិការកិច្ច និងទី៥ គឺការផ្សារភ្ជាប់គ្នារវាងថ្នាក់មធ្យមសិក្សាទៅឧត្តមសិក្សា៕